مـــــــــــنــــــــــــــــتـــــــــــــــدى حـــــــــــــبـــــــــــــــــيـــــــبـــــة

تعليمي ثقافي شامل


علي اسم مصر صلاح جاهين

شاطر
avatar
Admin
Admin
Admin

عدد المساهمات : 468
نقاط : 1432
السٌّمعَة : 34
تاريخ التسجيل : 21/01/2010

علي اسم مصر صلاح جاهين

مُساهمة من طرف Admin في الثلاثاء مايو 19, 2015 7:57 pm


علي اسم مصر

النخل في العالي والنيل ماشي طوالي
معكوسة فيه الصـور .. مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولدت من جديد
على اسم مصر
مصر .. التلات أحرف الساكنة اللي شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعي مقروطة
في مسامي مضغوطه مع دمي لها تعاريج
ترع وقنوات سقت من جسمي كل نسيج
وجميع خيوط النسيج على نبرة مربوطة
اسمعها مهموسة والا اسمعها مشخوطه
شبكة رادار قلبي جوه ضلوعي مضبوطة
على اسم مصر
وترن من تاني نفس النبرة في وداني
ومؤشر الفرحة يتحرك في وجداني
وأغاني واحشاني باتذكرها ما لهاش عد
فيه شيء حصل أو بيحصل أوح يحصل جد
أو ربما الأمر حالة وجد واخداني
انا اللي ياما الهوى جابني ووداني
وكلام على لساني جاني لابد اقوله لحد
القمح ليه إسمه قمح اليوم وأمس وغد
ومصر يحرم عليها .. والجدال يشتد
على اسم مصر
ولما زماني رماني عليل
نسيت كل شيء عن حبيبي الجميل
لكن هو أبداً
انا مانساهوش
نسيت مشيته وصوته كان شكله إيه
ورسمة شفايفه
ولمسة إيديه
نسيت نظراته
نسيت لون عينيه
وقوس الحواجب وسهم الرموش
لكن هو أبداً
انا ما انساهوش
نسيت إسمه وحكايته وعرفته فين
وعشنا سوى العمر
والا يومين
وكان م البشر
والا طير بجناحين
نسيت حتى كان له وجود أو مالوش
لكين هو أبداً
أنا ما انساهوش
قطعوا الأغاني وطارت نشرة الأخبار
دارت على كل دار في الكوكب الدوار
يا حاضرين اعلموا الغايبين بأنه في مصر
اتغير الاسم منذ الآن فأصبح .. مصر
ضحك التاريخ ضحكته المشهور بها واندار
ودخل مناقشة مع الجغرافيا عما صار
هل نعترف بالبيان اللي أذيع العصر
أم ننتظر مصر تطرد اسرائيل بالقسر
وساعتها تحصل بكل جدارة يوم النصر
على اسم مصر
على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي وبياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دموعي في كمي ومن ساعتها وعيت
على اسم مصر
مصر السما الفزدقي وعصافير معدية
والقلة مملية ع الشباك .. مندية
والجد قاعد مربع يقرا في الجرنال
الكاتب المصري ذاته مندمج في مقال
ومصر قدامه اكتر كلمة مقرية
قريتها من قبل ما اكتب اسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زي المنادي وفؤادي يرتجف بجلال
على اسم مصر
رحـيـلاً رحـيـلاً بغيـر هـوادة
رحـيلاً فإن الـرحـيل سعـادة
عبادة
إرادة
سيادة
ولادة
رحـيـلا .. إلى أين لـيس يـهـم
ولـيس يـهـم بأي وسيـلة ..
أجيـراً بلقمـتـه في البـواخـر ..
عـلى واحـد من جيـاد القبيلة ..
على مقعـد في ذرى الجـو فـاخـر
وتمـلأ الكـأس بنت جمـيلة ..
على قدمي .. أو بفكري .. أهاجر
أبادر
أغادر
أخاطر
أسافر
ولـكـن إلى أيـن .. لـيس يـهـم
إلى حيث لا تعبـر الأفـق شمس
إلى القـطب .. أو حلقة الاستواء ..
إلى حـيث يـسمـع لـلجـن همس
إلى بـاطـن الأرض أو في الـفضـاء
إلى مـرفـأ الغـد .. أو أرض أمس
أرى كل شيء ومن أين جاء
وافعل ما قاله القدماء
من الفقراء
أو الحكماء
أو الأمراء
أو الأشقياء أو البلهاء فليس يهم
لقد قيل وهو الكلام المهم
اللي يعيش ياما يشوف
واللي يمشي يشوف اكتر
شفت الجبرتي بحرافيش الحسين وبولاق
بان البلد ماشي زي النمس في الأسواق
بالفلاحين ع المداخل من بعيد وقريب
بالأرنؤوط بالشراكسة بكل صنف عجيب
مترصصين سور رهيب مزراق في ريح مزراق
كأنهم لا بشـر ولا خلقـة الخـلاق
ومصر فلاحة تزرق بين رقيب ورقيب
من غير أبو الهول ما ينهض ناهضة شايله حليب
والصبح بدري الجبرتي ينام وقلمه يسيب
على اسم مصر
مصر اللي عمر الجبرتي لم عرف لها عمر
وطلع لقاها مكان مليان عوام وزعر
جعيدية غوغاء يجيبوا تملي وجع الراس
وخليط أفارقه هنادوة روم ملل أجناس
والترك في القلعة والمماليك خدودهم حمر
كان عمرها ستلاف سنة .. كلها سنين خضر
بس الزمان يختلف زي اختلاف الناس
ناس تبني مجد وحضارة وناس بلا احساس
وناس تنام لما يزحف موكب الأحداث
على اسم مصر
أنا اللي اسمي حتحـور .. أنا بنت رع
مثـال الأمـومـة ورمـز الحـنـان
تفـيض حـلمـاتي وتمـلا الـتـرع
وتسـقـي البـشـر كلهـم والغـيـطان
أنـا ربـة الحـب حتـحـور أنـا
أنـا السيـدة المـنـجدة المـغـرميـن
وكـم مـن محـب ف هـواه انـضـنى
دعـاني وطيـبـت خـاطـره الحـزيـن
أنـا طـيبـة انمـا طـبـعي صـعـب
وديعـه .. ولـو ثـرت بـطشـي مـهـول
ما اشـوفش اللي قدامي لو ألف شعب
أدوسـهـم وتجـري دمـاهـم سيـول
ويـوم رع ما فـات بسنـاه في السـما
وكل العيـون خايفـة تنـظر اليـه
وجـالـه القمـر خلقتـه معتـمة
وعـدى قصـاده .. وضـلم عـليه
يا ويـل الـلي فتـح في ابـويا العـظيم
يا ويل من تطاول يا ويل من ضحك
يا ويـلك يا مصـر مصيرك الـيم
أنا اللي اسمي حتحور انا ح امسحك
يحـاول يهـديني رع ما اسمـعـوش
وادمـر واطـيـح في البلاد والعبـاد
أنـا الـطيبـه .. كنت زي الوحـوش
سفـكـت دماء البـنـات والـولاد
دبـحت المحبـين في عـز القبـل
هـدمت المعابد على المنشدين
قلبت على النحـاتين الجبل
حرقت الغيـطان هم والفلاحين
لحد ما رع نـادى ع الآلهة
وقال صـبوا في النهر كل النبيذ
وشفت الميـاه حمرا ومزهزهة
وظنيتها دم الضحايا الـلذيذ
شربت انتقامـاً شربـت شربـت
وأنا بالـعن المفتـري والغبـي
وحبـة بحبـة عن الوعـي غبت
ونمت على النيل في ضي أبي
وقمت .. بكيت من فؤاد أم ثكلى
ونهنهت فوق صدر مصر العريض
على العالم المبدورين جنبي قتـلى
وكان دمعي ينصب في النيـل يفيض
واقول ليه يا مصـر ولادك كـده
يا إمـا المذله يا يتـجبـروا
يا خوفـي يا فـرحة قـلوب الـعدا
ويا نـدمـي لو ما يتغيـروا
ومن يـومها والنيـل في نفس المعاد
يفيض كل عام قبل فصل الخـريف
بلون حمرة الـدم يملا البلاد
ويملا النسـأيـم بعـطر مخـيف
بعطري أنا الـلي اسمي حتحور أنـا
وعـطري مخـيف وحـنون وطـري
يفـرح بس مـرة في كـل سنة
ويهمس يا مصر اذكـري .. واحـذري
نهايته يا مصر اللي كانت أصبحت وخلاص
تمثال بديع وانفه في الطين غاص
وناس من البدو شدوا عليه حبال الخيش
والقرص رع العظيم بقى صاج خبيز للعيش
وساق محارب قديم مبتورة ف أبو قرقاص
ما تعرف اللي بترها سيف والا رصاص
والا الخراب اللي صاب عقل البلد بالطيش
قال ابن خلدون أمم متفسخة تعيش ليش
وحصان صهل صحى جميع الجيش
على اسم مصر
حصان عرابي جميل حصان عرابي أصيل
حصان عرابي رشيق ديله طويل
يسهر مع الخيل طول الليل يتكلم
ويقول أراء رغم إنه ماكانش متعلم
ويقف في عابدين وياخذ زاوية البروفيل
للرسامين يرسموه ونشوفه جيل ورا جيل
ويعدي كالريح على المجاريح ويسلم
وحافره ع الصخر في التل الكبير علم
ولما صابه انفجار القنبلة اتالم
على اسم مصر
والمس حجارة الطوابي وادق بكعابي
يرجع لي صوت الصدى يفكرني بعذابي
يا ميت ندامة على أمة بلا جماهير
ثورتها يعملها جيشها ومالها غيره نصير
والشعب يرقص كأنه عجوز متصابي
إنهض من القبر احكي القصة يا عرابي
يطل لي رافع الطهطاوي م التصاوير
شاحب ومجروح في قلبه وجرح قلبه خطير
وعيونه مغرورقين بيصبوا دمع غزير
على اسم مصر
مالك سلامتك بتبكي ليه يا طهطاوي
قال لك عرابي .. انكسر بسلاح أوروباوي
وسلاح أوروبا ماهواش المدافع بس
ده فكر ناقد مميز للثمين والغث
قلناها ميت ألف مرة ألف مرة بصوت جهير داوي
بس الحماقة لاليها طبيب ولا مداوي
ولا حد م الخلق بالخطر اللي داخل حس
الغفلانين اللي خلوا العقل صابه مس
قالوا الخطر هو فكر أوروبا لو يندس
على اسم مصر
أحسنت في القول صحيح يا ولد يا متنبي
جبت اللي جوه الفؤاد عن مصر متعبى
وحكمت بالعدل لكن بعضنا انظلموا
" يا أمة ضحكت من جهلها الأمم "
العلم كان عندنا من صغره متربي
لكنه هاجر وعدى البحر متخبي
لما الإيران هجموا ثم اليونان هجموا
ثم الرومان دمروا ثم التتار هدموا
ثم الجميع كل واحد جه مسح قدمه
على اسم مصر
أيها الديك رفيع الموضع
يا صفيحاً فوق مسمار يدور
صف لنا فعل الرياح الأربع
قل لنا .. لو كنت تدري ما يدور
قال صه . فالآن ريح الشرق جاءت
تحمل الضوضاء من سوق المزاد
وتغني دون لحن كيف شاءت
أنا ريح الشرق أدعى شهرزاد
أنا أحكي ثم أحكي ثم أحكي
وأمامي السيف كالعشب يميل
وبكائي يتساوى مع ضحكي
طالما كان بأسلوب جميل
ثم ها قد أرسل الغرب رياحه
تزكم الأنف برائحة عجب
وتغني كبغى في مناحة
أنا ريح الغرب لوني كالذهب
أنا صفراء برمل الصحراء
أدفن الخضرة تحتي دون رحمه
أوصدوا الباب بوجهي الحقراء
حسنا فلتصبح القرية فخمة
ثم ها قد اقبلت ريح الجنوب
بدخان الدهن تسري عابقة
وتغني انني أدعي الهبوب
أنا سوداء كبئر المشنقة
أنا سوداء كأفعى هائلة
كرماد النوم ينثر في العيون
كالعرايا في المروج الموحلة
سعداء .. تعساء ..يرقصون
وتأنى برهة ديك الصفيح
يلقط الأنفاس وهو يترنح
دائراً دورته مع كل ريح
وأخيراً صاح كالأسد المجنح
هللويا ..أقبلت ريح الشمال
في غلالات رقاق راعشه
وهي تشدو بحنو ودلال
ها أنا ريح الشمال المنعشة
إنني وردية مثل العسل
ديدمونا .. هكذا يدعونني
قد عبرت البحر يحدوني الأمل
لعطيل أسمر ..
يخنقني !
ومضى ديك الرياح في دعه
من يمين ليسار يتذبذب
وبدا اضحوكة وإمعه
وهو مصلوب شهيد يتعذب
وعلى رأي المثل
الديك الصفيح
بيدوخ ويا الريح
والديك الصفيح
م البيضه بيصيح
ويقول بالصريح
الفكر فوق في الشمال يا الله الحقوه يا ولاد
لحقوه ولاد من ولاد الأغنيا الأسياد
وهم راجعين رموه في الباخرة في البحر
ونزلوا حكموا في ظل الانجليز والقصر
ومصر في الشمس بتغربل كلام منعاد
عن ابن بنت ابن حنت وطارق ابن زياد
والانجليز راضية بالخطباء وخطب الفخر
خطيب يهز الرؤوس وخطيب يهز الخصر
وخطيب يموت موتة الأبطال قتيل القهر
على اسم مصر
والانجليز معجبين بمراسم التأبين
مات مصطفى كامل اتملت البلد صواوين
والمشرقين شوقي جابهم لجل يبكوا عليه
آه لو عرف هم إيه دلوقت وبقم إيه
المشرق الأولاني هو شعب الصين
هزم التخلف بتنظيم اشتراكي رصين
تنظيم يروح اللومان على طول كده برجليه
والمشرق التاني ينحط الحديد في إيديه
مليون شهيد يعني ثورة تخض شوقي بيه
على اسم مصر
هل مصر موميا جميلة صورتها فوق النعش
يعشقها مجنون ينادي عليها ولا تطلعش
هل مصر نار صفصفت والنفخ فيها محال
والأرض نشعت على رمادها استحال أوصال
سألت أنا الرافعي كان عجٌز ولا بيسمعش
لكن عينيه كانوا يحكولي قصص ما اشبعش
يقولولي ماتخافش مصر بخير وعال العال
مصر الجبرتي ومصر الرافعي حال غير الحال
انظر محمد فريد أعظم وأرقى مثال
على اسم مصر
خذ الكتاب في يمينك وانظر الترقيم
عند المحبة وعند الموت في حرف الميم
تلقى محمد فريد بينهم مقيم ع العهد
وتلقى وجهه المدوٌر زي قرص الشهد
مليان حماسة وكياسة وجدعنه وتصميم
على إيه مصمم؟ .. يسهٌم زي كل زعيم
ويقول على الثورة اللي وأدوا ثورته في المهد
أنا بابني في السر شيء صعب المنال كالفهد
على اسم مصر
محلول مركز من السكر في كباية
وف قلبه خيط يتلضم حباية حبايه
سكر نبات بللورات الماظ بتضوي ضي
وتفضل الألماظات تكبر شوي شوي
لحد ما العقد يبقى في الجمال غايه
ده الحزب في الشعب نضرب به المثل آيه
الصلب والسايل الاثنين سوا ياخي
تنظيم محمد فريد في كل قريه وحيٌ
بللوره بتشع بالثورة اللي يومها جيٌ
على اسم مصر
العقد الماظ ورقبة مصر لايقاله
ضيٌع فريد كل أرضه عليه وأمواله
وفجأة حاكموه ويالله نفوه عن الأوطان
وحرب عالمية أولى ووفد م الأعيان
وثورة والانجليز انحطوا وانشالوا
مين اللي نظٌم فلول الشعب ده بحاله
ازاي جميع البلاد تنهض في نفس الآن
القاهرة اسكندرية منفلوط اسوان
وبعيد يا ولداه فريد مرمي وحيد شرقان
على اسم مصر
السيمفونية اسمها الثورة على المحتل
سنة تسعتاشر اتعزفت في كل محل
تأليف محمد فريد ألفها من سنوات
وكتب لها النوتة بوق وبيانو وكمنجات
عزفوها من غير قيادته وجمعهم ما اختل
غير وقت صرف الأجور لما النفر ينذل
من وقتها وغلوشت نغمات على نغمات
وسعد زغلول زعيم مشغول في الانتخابات
يخطب ويضرب يابده يطبع البصمات
على اسم مصر
وف أوضة عريانة فيها كل شيء بردان
رقد فريد وحده بالحمى والهـذيان
وقام وقف ع السرير في تلج المانيا
ينده يا مصر اسمعي اللي مفاق الدنيا
ووصيتي الثورة لاشتراكية والبنيان
ثورة بحق وحقيق مش حركة م الأعيان
ماتغمضوش عن وحوش الغرب ولا ثانية
ح تروح وحوش لنجليز تطلع وحوش تانية
وسقط ونطق الشهادة ونظرته الحانية
على اسم مصر

أنا الذي مشيت ادوٌر باشتياق وحنين
على مصر .. والمشي خدني من سنين لسنين
لحد ماسنيـنهـا وسنـيني بقم واحد
وعاصرتها يوم بيوم لم فاتني يوم واحد
وحضرت شاهد عيان مولد وموت ملايين
مازعلت من كلمة قد البركة في الجايين
مين هم دول يا جدع .. ما توحد الواحد
البركة فينا وفي السامعين بالواحد
أنا قلتها بنرفزة .. من غيرة الواحد
على اسم مصر
مصر الرمال العتيقة وصهدها الجبار
والنيل كخرطوم حريقه وحيد في وسط النار
في إيدين بشر نمل رايحه وجاية ع الضفة
فيهم مطافي وفيهم كدابين زفة
وفيهم اللي تعالى وقال أنا حكمدار
وكل باب م البيبان مقفول على اسرار
وكل سر بحريقة عايزة تتطفا
من أهلي تندهلي وتقوللي تعا اتدفا
أنا اللي عمري انكتب إلى يوم ما اتوفى
على اسم مصر
على اسم مصر ارفعوا الانخاب واملولي
شدوا الوتر ع القمر يا شباب وغنولي
نسكر على حبها بالفن والاحساس
نسكر ودمع الحماس يملا لنا تاني الكاس
احنا يا حلوه الفدا بس اطلبي وقولي
يا سمره بعيون كده وسنتك لولي
وغنوه الحب تعلا ويسمعوا الحراس
يصفروا ويحضروا بفرقة طبول ونحاس
ويتقفل سجن مصر امام عيون الناس
على اسم مصر
والمطبعة تدور وتخطف كل إيد منشور
عيش لسة م الفرن طالع ريحته ريحة النور
يا فلاحين يا جنود يا طلبة يا عمال
عدوكم حلف لاستعمار ورأس المال
عاش الطريق لشتراكي قوم يا شعب وثور
وحكمكم حكم اقطاعي عميل مأجور
عاش الكفاح بالسلاح إلى القنال يا رجال
خلوا حياه لنجليز المستقرة محال
والشمس نامت ليلتها وفكرها شغال
على اسم مصر
القاهرة في اكتئاب والأنس عنها غاب
من عتمة تدخل لعتمة كأنها ف سرداب
أو قرية مرمي عليا ضل هجانة
الحظر م المغربية بأمر مولانا
ومصر في الليل بتولد والبوليس ع الباب
صبية ولاٌدة يابا ولحمها جلاب
طلع الصباح زغرطت في السكة فرحانه
على كتفها مولودتها لسه عريانه
وف لحظة كانت جميع الدنيا دريانة
على اسم مصر
على كتفها مولودتها وتجري وتنادي
ياولادي من يوم ميلاد الأرض ياولادي
ينهض لها امحتب بدواه يقويها
وبنتاؤر ينشد الاشعار يهنيها
وسعد زغلول يكح يزلزل الوادي
وعرابي يهمس ومصر ترد بتمادي
تقوله آه برضه ثورة جيش وح احميها
بالدم بالروح بكل حياتي ح افديها
اما الأسامي معنديش غير اسمها
على اسم مصر
مولودة كبرت وشبت في تلات تيام
من هبة هبت .. لثورة لبت الاحلام
والعرش عام راح ايطاليا بعيد ورا البراميل
يا هلترى دي حقيقة والا وهم جميل
ومصر من إمتى كانت حظها بسام
ظهر قميص العرق متشمر الاكمام
أنا شفته عقلي برق وبدأ لصاحبه يميل
نقشت له ف قلبي احلى وأروع التماثيل
بدراعي والمطرقة وبإيدي والأزميل
على اسم مصر
avatar
Admin
Admin
Admin

عدد المساهمات : 468
نقاط : 1432
السٌّمعَة : 34
تاريخ التسجيل : 21/01/2010

رد: علي اسم مصر صلاح جاهين

مُساهمة من طرف Admin في الثلاثاء مايو 19, 2015 8:00 pm

الليلة الكبيرة

غناء الشيخ سيد مكاوي

قبة سيدنا الوالي دي نوروها

محلا البيارق و الناس بيزوروها

قبة سيدنا الوالي في الجو عالية

محلا البيارق لما نوروها

حمص حمص دا اللي ماينقص

عمار يرقص يرقص و يقول

اللي شاف حمص و الا كلشي

حب و اتلوع و لا طالشي

بسترك هات حبة بقرش

حمص حمص حمص

إسعى إسعى إسعى إسعى

خدلك صورة ستة في تسعة

إسعى إسعى إسعى إسعى

ياسي عجورة النار خسعة

الله الله الله الله

عجمية باللوز طعمية أراجوز

اليلة الكبيرة يا عمي و العالم كتيرة

ماليين الشوادر يابا في الريف و البنادر

دول فلاحين و دول صعايدة

دول من القنال و دول رشايدة

يا حضرة الأراجوز قولي

نعم يا عمدة عاوز إيه

منين يروحوا لمتولي

إمدح نبينا و صلي عليه

اللهم صلي عليه

تمشي كدة على طول على طول

لحد ما تلاقي عمارة

تكسر يمين تلقى بتاع فول

دكانته على ناصية حارة

تدخل يمينك و شمالك

شارعين و في التالت تكسر

شارعين و في التالت أكسر

على اليمين واخد بالك

و تمشي على طول تتمخطر

و أمشي على طول و أتمختر

تفضل كدة تمشي و تلف

و تخش من مطرح ما طلعت

و أخش من مطرح ما طلعت

و لما تلقى مقلة لب

تعرف بإنك توهت و ضعت

دي وصفة سهلة قوي قوي

دي وصفة هايلة قوي قوي

مع السلامة يابو عمة مايلة

فتح عينك تاكل ملبن

فينك فينك تاكل ملبن

إوعى لجيبك لا العيب عيبك

قرب جرب نشن وسطن إيدك و سطن

إضـــــــــرب

يحميك يا بني تبقى غالبني

قرب خدلك حتة ملبن

فريرة للعيل يابو العيال ميل

خدلك سبع فرافير

زمارة شخليلة عصفورة يا حليلة

طراطير يا واد طراطير

طراطير طراطير طراطير

الليلة الليلة السيرك تعالوا

دي فرجة تساوي جنيه قولوا هيه

بمناسبة هذا المولد يا ولاد

برنامج سواريه قولوا هيه

في السيرك شجيع يهجم عالسبع

و يركب دوغري عليه قولوا هيه

و بنات قمرات زي الشربات

حلوين مش عارف ليه قولوا هيه

و كمان بلياتشو تعالوا إسمعوا ناتشه

و شوفوا هيعمل إيه قولوا هيه

هيـــه هيـــه هيـــه

أنا شجيع السيما أبو شنب بريمة

أول ما أقول عليهوب و أصرخلي صرخة

السبع يتكهرب و يبقى فرخة

حالاً بالاً سأصارع أسد إنما إيه متوحش

و هخلي وجهه شوارع تسقيفة يا ناس ميصحش

أهو جه أهو جه تسقيفة بقا

تسقيفة أمال تشجيعة أمال

تعالالي الالي اللالي يا حبيبي تعالالي

السمك مقلي كل و برقلي صنف زي الفل

استخار و إختار فشة أو ممبار

يالا سمي و كل

يام المطاهر رش الملح سبع مرات

بمقامه الطاهر خشي و قيدي سبع شمعات

يا عريس يا صغير

علقة تفوت و لا حد يموت

لابس و مغير و هتشرب مرقة كتكوت

بالزمة دة سابع عيل مزفوف من وقت قليل

مولد شالله يا معلم عقبال أولادك كلم

واحد مظبوط و إتنين مصري

عمك حاضر جايلك دوغري

مسا التماسي مسا التماسي

ياورد قاعد على الكراسي

هات شاي يا دقدق عيني و راسي

سمعنا يا ريس حنتيرة

للصبح معاك السهيرة

سمعنا سمعنا

يا غزال يا غزال العشق حلال

دوبتني دوب خلتني خيال

يا شفتك فص فراولة و أنا لا قوة و لا حول

دوختلي قلبي على اولة

أه يا غزال العشق حلال

يارب يا عالم بالحال

تهدي حبيبي و يصبح عال

و أغني و أرجع بالموال و أقول يا غزال

وقف ياريس حنتيرة في ناس هنا قاعدة كتيرة

ولا حد قال هات تعميرة و لا واحد شاي

أه اللي هيطلب راح يقعد

و اللي ما يطلبش يبعد

يالابنا نخرج يا مسعد شالاع التورماي

ورينا القوة يا بني إنت وهو

مين عنده مروى و عاملي فتوة

يقدر بقدارة على زق التارة و يفرقع بمبة

وسع أنا أزق التارة و أضرب ميت بمبة

دانا الاسطى عمارة من درب شكمبة

سيطي من القلعة لسويقة اللالة أنا واخد السمعة

طب يالا تعالى لاياعم سعيدة هأأو دي البدلة جديدة

هأأأه سعيدة يابو بدلة جديدة

إوعد يارب إوعد أدي كمان قهوة

يالابنا يا مسعد ندخل على سهوة

طار في الهوا شاشي و إنت متدراشي

طارفه شاورلي شاورلي عليك

حكم الهوى ماشي

هوا العصاري على سطح جاري

خدني و رماني عليك و لا إنت داري

أهين يا ناري منك يا جاري

خدني ورماني رماني عليك هوا العصاري

طار في الهوا شاشي و إنت متدراشي

طارفه شاورلي شاورلي عليك

ماشي ماشي ماشي كلامك

اللي هيطلب راح يقعد و اللي مايطلبش يبعد

يالابنا نخرج يا مسعد شارع التورماي

ناس من بلدنا هناك أهم

روح يا إبراهيم إندهلهم

سلامات عالبلديات

ليلتكوا أنس و جلجلة إنشد و لعلع يا ولا

شفت في منام صاحب المقام دة أوبهة

و يمامة حايمة عليه بتسبح ربها

ميلت فوق يده وجيت أحبـــــها

صحوني من النوم خدت بعضي

وتني جاي و بعودة حـــي

ياولاد الحلال بنت تايهة طول كدة

رجلها الشمال فيها خلال زي دة

زحمة يا ولداه كام عيل تاه؟؟

اليلة الكبيرة يا عمي و العالم كتيرة

ماليين الشوادر يابا في الريف و البنادر

    الوقت/التاريخ الآن هو الخميس أغسطس 16, 2018 7:52 am